木盒：福音派信徒走進靈恩派教會

不知不覺，移咗民已經兩年。移民前一直思考點樣處理基本生活、揾工、小朋友讀書等等問題，從來無諗過原來移民都係提升信仰嘅契機。

我本身來自福音派教會。依家恆常返緊一間本地人教會，教會本身立場係對聖靈開放。喺教會入面認識到由傳統福音派到極端靈恩派嘅弟兄姊妹。我對靈恩背景嘅弟兄姊妹十分好奇， 好想了解佢哋對信仰嘅睇法， 所以會特別留意佢哋嘅講道內容、唱嘅詩歌，同埋佢哋分享嘅屬靈經驗。經過一年幾嘅觀察、接觸、睇聖經同自我消化，想同大家分享以下個人得著。

▍解經方式有別

靈恩派嘅解經好自由，自己領會到咩就講咩，完全無包袱。咁樣某程度係一件好事，因為聖經係寫俾大眾睇，並唔需要讀過神學先有資格睇得明。有咗呢個「解經嘅自由」之後，我覺得聖經變得易明同好睇咗好多。

不過當解經冇規範嘅時候，又會出現另一個狀況。曾經有一位靈恩派弟兄解說掃羅召撒母耳的靈嘅時候，佢話呢度所講嘅「靈」並非指真正嘅撒母耳，而係指緊一個「熟悉的靈」，即係好似問米婆招上嚟嘅靈咁，佢可以講得出好多關於你自身嘅嘢，不過佢就唔係嗰個你想揾嘅人。當時聽到呢番解說真係有啲驚，心諗聖經無講過係咁喎！當下覺得將經文過份解讀咗，同埋太多自創嘅學說。

至於福音派，好多時都由原文開始講起，又會檢視當時嘅情況、文化背景、語言習慣，盡量解讀作者嘅原意。咁樣解經好扎實好理性，不過只要讀到一啲關於超自然事件嘅經文，好多時都解唔通。

有一位弟兄引用彼得對哥尼流一家嘅講道，想用嗰段經文說明每當一個人信主嘅時候，聖靈就會降臨係嗰個信嘅人身上。但係我之後再三查考聖經，都睇唔到呢個意思。我見到嘅係：哥尼流雖然係外邦人，但佢本身就已經信咗主，聖靈降臨係發生喺遇見彼得之後。連同佢之前舉嘅其他例子，全部都係同一個形式，就係先信主，之後有聖靈嘅洗，然後講方言。我有同呢位弟兄分享過自己嘅想法，但佢認為我嘅想法好容易令人轉去追求聖靈充滿同靈恩經驗。其實，只要係直接將經文講出嚟，會眾點樣去接收訊息就交返俾佢哋自己領悟，未必需要過分擔心。

▍⁠ ⁠同行做法有別

我認為福音派嘅文化著重關心、問候、與有需要嘅人同行，感覺好窩心，亦令承受苦難嘅人感覺上輕省一啲。不過因為未必太感受到同上帝嘅同在，成日好似約伯經歷苦難咁。

至於我認識有靈恩背景嘅弟兄姊妹，會同有需要嘅人一齊祈禱，聽吓上帝有咩講，有咩領受，然後就覆述出嚟，完成任務，相對上比較少長時間同行，所以被服侍嘅對象未必真正感受到被關心、被支持。

靈恩派同福音派都各自選取咗聖經唔同嘅層面去實踐。其實聖靈讓我哋每日都經歷到上帝嘅真實。而理性咁睇，聖經亦能夠讓我哋正確咁明白上帝嘅教導。兩者夾埋，我認為先至係聖經所講嘅信仰。

（標題為編者所擬；作者原題為〈流散嘅福音派信徒走進對聖靈開放嘅教會〉）