食花生？講是非？謠言摧毁一個信仰群體。

最近有男明星同佢個女助理解除僱傭關係，本來係一件好普通嘅事，不過加上唔同人喺唔同時間出咗啲消息，令到廣大網民十分關心呢件事，甚至傳出好多未經證實嘅推測。（話明係推測梗係未經證實）呢件事令我諗起教會裡面一個教導：「愛心裡說誠實話。」

今日嘅重點唔係講愛心，而係講誠實話。究竟講幾多先係誠實話，講幾多先係謠言？呢個係喺每個人心裡面都有佢自己嘅標準。不過有時喺教會裡面，我哋讕係要愛心裏說誠實話，用愛心包裝過嘅嘢，就當係誠實話啦！即係點？

例如：一個男團友同一個女團友行得好埋，你本著愛心去同導師講佢哋行得好埋，導師又好有愛心咁關心佢哋，咁佢哋就被關心啦。本來咁樣係冇問題嘅，不過，可能喺言語之間加鹽加醋，就令到箇中關心變咗味變咗質。有時導師未必下下咁清楚啲團友發生咩事，咁有人報告，就自然要去問清問楚。問清楚唔係問題，因為去到呢啲位，導師都會識得分咩係謠言，咩係真實。但係，如果報告嘅人唔係去搵導師，而係同其他團友私下議論，咁你覺得呢件事係愛心定係謠言？個團契點樣建立得到？

當我哋以為愛心可以做橋樑，原來整整吓變咗是非做人情。教會關於說話文化其實係要再教育，因為我哋不知不覺之間就將是非、事實、講人壞話、食花生呢啲觀念混淆。真正要學嘅係：有時當住人哋面講，唔能夠咁做，就唔好發表太多言論。甚或乎，我哋寧願係某啲場合唔公開講弟兄姊妹，用一種斬腳趾避沙蟲嘅方法嚟面對。當然，咁樣做係好傻。不過，有啲位一發不可收拾，我哋就要諗係唔係過咗火。

嚟到最後，我哋其實需要多啲檢討自己喺講說話嘅時候究竟帶着咩心態，係為咗人好，定係為咗討好某啲人？究竟一個基督教群體係唔係可以建立喺是非上面？作為傳道人，你係關心弟兄姊妹，定係八卦？定係，我哋為咗打破冰冷嘅場面，利用是非增加多少熱度？咁就真係知否是非可以做橋樑，未怕厚圍牆。

利申：呢幾年開始發覺自己作為一個傳道人，喺講嘢上面都係好多缺失，係好需要糾正。咪講自己係幾咁神聖，而係因為我睇見有人俾人唱過，所以知道個問題有幾大。

（原載於作者IG，標題為編者所擬）