當你失戀，會做啲咩？去海邊漫無目的咁行？瞓喺張床狂播失戀歌？約朋友落酒吧飲返杯？

筆者最近睇咗套戲《汪汪夢𥚃人》，本來畫風唔算鍾意，戲名又kam kam地，唔太想睇，畀友人慫恿話「適合拍過拖，或者對愛情有憧憬嘅人睇」，就去咗睇。其實唔算emo，有啲位好有童趣，不過估唔到最後一幕旋律響起，兩人起舞，突然情感湧出，心頭抽搐不止。

盡量唔劇透，剩係分享少少呢套戲喺筆者內心激盪嘅漣漪。

▍    茫茫人海遇見你，是不配受的福氣？

電影開波，就係阿狗一條友（狗），夜晚對住部電視，開又覺得嘈，唔開又覺得悶，望住個空mon又覺得似塊鏡反照自己有幾落寞。望出窗外，對面人家卿卿我我，燈光温馨。城市人似阿狗，遠離山水、忘記家人、不再相信上帝，彷似一出世睜開眼就是空房無盡冷氣夜。

呢個時候，電視突然賣廣告，大大隻字「Are you alone?」，然後放映機械人伴侶嘅影像，似十字架咁旋轉。阿狗渴望購買伴侶，企圖救贖生活沉悶嘅自己。

導演處理得好温柔，無盲目歌頌「茫茫人海的邂逅」，都無猛烈批評。筆者雖然渴望愛情，但就係因為咁，先覺得好易將愛情視作孤獨嘅救贖，期望愈大，失望愈大，離愛情同埋救贖就愈遠。不過，唔只得愛情被包裝成「幸福生活」一部份，城市本身就係一個「應許之地」，喺𥚃面自給自足，任出面風大雨大，都唔使擔驚受怕。

▍    城市令人孤獨

孤獨、抑鬱、自殺，愈發達嘅城市，呢啲現象就愈唔陌生。當大隻牛郵差送機械人畀阿狗，筆者先發覺佢屋企度門上咗好多把鎖，城市人對「陌生人」嘅恐懼，寫晒出嚟。害怕受傷，害怕危險，就連投入關係，也害怕受傷，覺得危險。很諷刺，房門的鎖，本應保你安全，卻令阿狗更提心吊膽，猜疑鄰舍會否心懷不軌。

城市的主題樂園、商場、娛樂，本來應該令人快樂，轉個頭卻可以令你空虛，甚至將你困喺空虛入面。阿狗同機械人去沙灘樂園玩，本來好開心，不過當阿狗發現機械人壞咗，想揾人幫手，卻已經入黑，一個人都揾唔到。第二日帶齊啲嘢諗住修理機械人，點知圍晒鐵絲網，出年夏天先再開。渡假園區變成監獄，困住動彈不得嘅機械人，隔開佢同阿狗。

筆者覺得，現代人嘅孤獨感特別強烈，係因為現代城市發展特別發達，城市將人隔離嘅技術愈嚟愈精密。將人隔離得愈徹底，人就愈依賴城市生產嘅享受、幸福、美夢，無咗佢唔得。筆者試過壞手機，馬上感受到社交斷裂嘅不安；試過聖誕行街或者IG見到情侶放閃，忍唔住妒忌；工作壓力愈大，愈想放假去旅行，使大咗又開始驚銀行存款等如零，驚無錢玩、無錢結婚買樓、成家立室，於是繼續打份牛工⋯⋯或者我地同阿狗，唔係差好遠。

▍    誰在群眾中間獨徘徊

其實阿狗起碼有樓住，有得去吓打保齡、滑雪、釣魚，唔使瞓街、流亡，唔使畀炮聲炸醒。阿狗就算孤獨，都係個體被隔絕嘅孤獨，但當呢個隔絕網都無埋，先係最孤獨嘅城市人。

基督徒鍾意講「相信上帝有最好的預備」，好似耶穌嚟係為咗信徒有拖拍，唔記得咗佢都係「單身狗」。不過耶穌又唔係要人學佢獨身，只係用行動向人暗示，揾唔到伴侶唔使不安。

耶穌要處理嘅孤獨，唔係「揾唔到另一半」，而係畀城市隔絕，就算同成班人一齊，都一樣面目模糊，係無臉人群亂撞如迷羊嘅孤獨。當時無論去到邊，都有一大群人痴住耶穌，期望佢畀飽飯佢地食，甚至率領佢地立國。但耶穌無高呼要眾人「為主獻出心臟」，無成為群眾期望嘅君王、救世主。佢無留喺某度太耐，做大個事工，吸多啲followers，反而隔一陣就會「dump低啲羊」去第二度。

佢咁做唔係拋棄人群，而係覺得將人同群眾拉開，人先會揾返自己，揾返自由。例如畀鬼附嘅格拉森人、患血漏幾十年嘅婦人，本來都只係no stake in society嘅nobody，係遇見耶穌之後，佢地先似返「個人」。

耶穌所傳的天國福音，唔包括「揾基督徒伴侶，建立基督化家庭」，或者「讓掌權者信主，建立基督教王國（或國家，或社會）」，偏偏我地就係想上帝創造我地心目中嘅「天國」。但耶穌其實唔係呼召我地跟佢去邊，因為遇到佢就可以安息，唔使再追尋、唔使再捱。

《汪汪夢𥚃人》入面最似耶穌嘅動物，係拾荒嘅浣熊。至於點解，就唔講咁多喇。