抒傳道：教會點解咁鍾意講寬恕係無條件？

點解教會咁鍾意講無條件寬恕？除咗我哋本身要學習耶穌饒恕得罪你嘅人七十個七次之外，饒恕本身象徵你獲得上帝嘅饒恕，而你亦都願意去饒恕人。不過問題嚟喇，點解教會咁鍾意要人哋無條件寬恕？

如果按照聖經嘅教導，有啲人屢勸不改，保羅嘅教導喺林前5:11 話：「但如今我寫信給你們說：若有稱為弟兄是行淫亂的、或貪婪的、或拜偶像的、或辱罵的、或醉酒的、或勒索的，這樣的人不可與他相交，就是與他吃飯都不可。」咁教會點解唔跟保羅嘅教導，甚至有時對犯事嘅人不了了之？

利申：唔係所有教會都係咁，但你有心搵資料一定會搵到。

首先，呢種無條件嘅寬恕其實唔係真係咁無條件，因為牽涉罪嘅時候，保羅都係希望人哋改過，而唔係重複犯罪。如果我哋認真啲睇行淫婦人俾人拉咗嘅故事，你就會發現耶穌最後同佢講：你以後也不要犯罪了。某程度上，唔係你唔饒恕佢，而係為佢好希望佢唔好再犯事。

但現代華人教會係承接好多儒家思想，其中《論語》：「父為子隱，子為父隱，直在其中矣。」最能夠代表呢個寬恕嘅問題。咁佢講乜？當子女犯下過失，作為父母，不會到處張揚，反之亦然。咁樣父子相隱，都是天理親情在當中的自然流露出嚟。加埋嗰啲「家醜不外傳」、呢啲係家事嚟嘅諗法，咁樣咪有事都唔去處理，希望用一個簡單直接粗暴嘅方法嚟處理咗相關嘅事情或者嗰啲人。

唔好問教會點解變成咁樣，你試吓去一間餐廳，食食吓嘢有老鼠，你以後仲落唔落去食？