「得㗎啦，你都係唔好講嘢啦。」呢個相信係大家喺教會俾某一啲人關心嘅時候，自己嘅心聲。

返得教會耐，總係會經歷人生高低起伏。當你人生低潮嘅時候，教會總會有人幫手同埋加油。但有啲時候，有啲人嘅加油，係火上加油，越整越衰。教會點解唔教下人點關顧人？唔知你教會有冇一個部門叫「關顧部」？佢係一個好神奇嘅部門，因為佢係主宰住教會嘅關顧，但好少教人點關顧。咁邊個教？主日學部/教育部，但佢哋又唔會覺得關顧應該出現喺主日學課程入面，咁就令到教會嘅關顧進入一個神奇嘅狀態。

結果，識得關顧嘅人去做關顧，唔識關顧嘅又去做關顧，咁樣就倒瀉籮蟹。如果有關顧部，入面就會變成識關顧嘅成員要關心唔識關顧嘅成員。咁樣，識關顧嘅人就分身乏術。不過久而久之，識嗰班都係會教到唔識嘅人點樣關顧，問題都叫做解決，係佢哋辛苦啲。其實佢哋好叻，但叻極都唔可以一個人睇哂，總係有漏網之魚。咁，就會出現一開始個情況——有啲人不如唔好講咁多嘢。

咁點做？問吓自己係有心關心人定係信口開河？定係滿足緊自己嘅宗教需要？有心關心係對方肯俾你關心佢，你又可以委身一段時間（基本3個月起跳）關心佢，咁先係進入關顧嘅起點，之後嘅嘢返教會問嗰啲你覺得佢好識關心人嘅人，起初依樣葫蘆，然後慢慢關心固定一兩個同性別肢體（年紀相若就更加要小心，因為人都係好軟弱），咁就真係關顧佢啦！

至於口腔期不滿足（編按：類似「需要別人依賴佢，嚟肯定佢嘅價值」）嘅長輩嚟關顧，你都係惟有避得就避。唔係你以為，佢哋會輕易被打發？冇㗎啦，你唔開心又冇咁好氣，真係逃避可恥但很有用！