天黑，路過公廁前嘅後巷，見到有道光滲出嚟。行過之後又小小在意，就返轉頭望望。一眼望埋去，有鞋、襪、衫、褲、毛巾、衣架、水樽、環保袋⋯⋯仲有檯櫈風扇。公廁隔離竟然有人住？

阿姨本來準備食飯，見我喺度阻住佢，就問我咩事。我話見到有光就好奇，突然見到有人就緊張。阿姨見到我咁反而個樣寛容咗，同我講多兩句。原來呢度唔係有人住，而係一班清潔工友喺度休息。佢哋唔係清潔公廁嘅，而係掃街嘅，唔知點解又唔係垃圾站入面。

呢幾日都落大雨，我就問佢係咪照開工。阿姨話「梗係啦，仲淋到呢度濕晒」，我望望個頂，只係由幾塊舊Banner搭出嚟，梗係濕。再加上係公廁隔離，有啲位置長期積水，佢哋班工友成日都被蚊咬。唔知係咪好少同其他人傾偈，或者平時收垃圾都好匆忙，阿姨好似幾鍾意同我傾。

我有啲慚愧，因為平時真係好少留意佢哋——即使自己以前係做社關嘅。佢哋工作時，就算喺街頭我哋都睇唔到佢哋；佢哋休息時，地方隱藏喺橫街窄巷，睇都睇唔到。呢個社會就係咁可悲，白領容易被人見到，勞動工作就無人會關心。

諗到呢度，個心本來沉一沉，呢個時候阿姨打開飯盒喺我面前食，食得好casual。佢呢份自在令我又再慚愧咗一吓。當我都用咗資本主義嘅眼光去睇佢嘅處境，咁叫「可憐」，而佢可能唔認為我哋有咩大分別、自己有幾淒涼，喺短短嘅相處反而流露出「對等」。

道別之後，我再諗咩嘢係基督信仰嘅「憐憫」。如果係「可憐」，咁就同主流價值觀無咩分別；如果係「對等」，咁不如叫「同行」、「陪伴」諸如此類。然後調轉諗，如果我係佢，我有咩感受？我希望同我傾偈嘅人唔好當我係異類。我期待嘅真誠對話係願意花時間去聆聽彼此，而唔係自說自話。諗吓諗吓，好似明多咗耶穌道成肉身，就係神嘅憐憫。

呢種方向嘅社關，我自覺就唔係做義工，只係做返一個貼地啲嘅人。唔肯定咁樣做信仰上有無醒覺，但醒咗嘅話應該好難瞓返。我唔知阿姨之後記唔記得我，但我會記住佢，記住今晚。

有興趣一齊探街工可以話我知，我1/5會去。