尋日有單勁爆嘅消息，就係有個就退休嘅牧師，因為抄人講章所以俾教會即炒。呢個消息一出街，即刻引來好多教會界朋友share呢件事。

講章點寫就唔係今日重點，重點係究竟教會炒人咩準則？抄襲係唔係大罪到要即炒？邊個冇抄過講章嘅，就幫手炒佢！大概由老到少，一路一路咁走，直到一班唔使講道嘅人，就落手炒佢。本傳道評價：抄襲問題普及，但罪不至炒。咁咩情況下先炒？通常都係以下三種情況：1、犯刑事；2、離婚或性失德；3、權鬥。

1，犯刑事。係講緊佢做做下犯刑事，咁佢都要面對結果，就算唔使坐監，佢都好難繼續喺間教會做落去。通常都係自己辭職，除非穿教會櫃桶底，咁就要炒。（炒佢個理由下面再講）

2、離婚或性失德。華人睇性睇得好重，傳統會將性同婚姻綑綁，唔理你認唔認同，總之就係咁運作。一有離婚或性罪案（拉到）就炒得，拉唔到就算全村人都知都隨時唔炒得。婚外情都係一樣，拉唔到都唔炒得。（炒佢個理由下面再講）

3、權鬥。鬥輸咗，就會俾人用唔同嘅理由炒佢或迫佢走，通常迫走多，因為炒人係好麻煩（點迫走有機會再探討）。但所謂輸咗好多時係事主從來都冇鬥人，只係人哋睇佢唔順眼，姐係有心裝冇心嗰隻。嗱，咁點炒佢好？有樣嘢叫「不合乎聖徒體統」，大部分教會請傳道人都有呢樣寫明，佢一不符合就可以炒佢。咁連埋1同2，都係用呢個原因炒佢。

奉勸一句，冇乜唔好等人炒，自己走好過。因為就算佢即炒你補一個月，你之後點同下家解釋先至係問題。同埋，如果同長期服務金有關（計過發現有），咁你就真係諗下點做先好，因為嗰筆錢唔細，隨時係養老金嚟！真係同教會傾唔掂，都係勞記見。勞記見完係會通天，呢樣要留意返！