筆者信主八年，返過靈恩派教會和福音派教會。最近先加入聖公會嘅禮儀教會，對我嚟講教會嘅傳統節日同禮儀都係新鮮事，而傳統教會嘅活動讓我更明白奧古斯丁嘅告誡：「四旬期應該喚起那些平時鬆散懶惰的人操練靈魂和身體學效基督。」換言之，恆常既定嘅活動有助我哋操練謙卑、操練靈魂。

最近筆者睇到一篇講述聖灰日變噱頭嘅文章，批判時下信徒將聖灰日嘅教會活動用嚟影相打卡，到此一遊，猶如情人節收到花影相咁。不過筆者對於打卡影相無太大反感，有影相打卡唔代表啲乜，人心裡悔改咗幾多只有主知。我覺得所有行為只要唔影響到人就得，唔使因為做得低調而沾沾自喜。

以前嘅我可能真係會笑人咩都影一餐，無內涵無靈魂。不過當靜下來謙卑去諗，其實好多人影相打卡都可能有唔同嘅原因：好多中年老年人為咗留住回憶，會做每樣嘢都影下；有人想更多人認識呢個節日而影低，打一篇文再spread開去；信徒覺得自己為上帝做嘅嘢遠遠都未夠，打埋卡先心滿意足。

情人節見到好多人收花影相，我更不想批判，因為收到情人對自己嘅心意想分享喜悅，都係值得我哋戥佢開心嘅事，當中可能都會有曬命成份，但係曬命背後何嘗不是一種需要上帝幫助嘅軟弱？

如果一個噱頭嘅影響力足以令人認識活動嘅核心繼而令人有反思，都係一件好事。人永遠喜歡量度人心，當我哋常常恥笑法利賽人，但往往變了法利賽人都不自知。

奧古斯丁後半部分嘅告誡咁樣講：「……操練靈魂和身體，通過謙卑和仁愛，通過禁食和施捨，通過節制和寬恕，通過分享祝福而不是報復，我們才能脱離邪惡的轄制，我們的禧告通過踐行良善，才能追求並實現和平。」