最鍾意的歌手陳蕾橫掃叱咤幾項大奬，小雨雀躍之餘，忍唔住手痕，尤其是令我迷上豹哥的〈窮人的薔薇〉，雖然唔係新歌，又唔算成日聽，但每次聽都有新的感動，甚至激動。呢首歌節奏緊逼，一句接一句都係警世之語，加上豹哥把聲總是聲嘶力竭用盡全力呼喊，歌詞、節奏、歌聲合成一股生命力，令人諗起小雨同樣好鍾意的Bob Dylan，同埋佢〈暴雨將至〉(A Hard Rain’s Gonna Fall)呢首歌的先知氣質。

▍   有些傷口不結痂

第一次聽陳蕾，係同朋友行上屯門青山，聽住〈相信一切是最好的安排〉的歌詞「今天跌倒，不用畏高」，「不需要慌，天定會光」，一步接一步上山，想像自己係「穿上武裝，繼續流浪」的武僧，「孤身奮起」，發現「世界還很大，還不壞」。兩年前的年頭，19年的創傷猶在，就已被投進口罩的侷促，好想突破。呢首歌就似預告，你可以變得更好。

嚟到〈窮人的薔薇〉，黑暗迎面而來，好似少咗份輕省，多咗份沉重。「全世界也染上了怪病」，不知「何時開始喜歡相爭相剋相害」，而人微言輕的「平凡人民要怎麼拯救？顫抖的雙手，用眼淚祈求，沒法換來時日倒流⋯⋯」戰火炸死的同伴不會回來，污染的水不能潔淨，「能安好歸家，沒重傷，已經很足夠」，剩下的只是微不足道的温柔，僅夠身邊人取暖。

不過，沉到最底，係為咗一嘢頂到最高。豹哥當然唔甘於頹廢，更唔止滿足於小確幸，「剩呼吸一口，都必須抖擻」，抖擻精神，昂然向上。「不死尚有無限宇宙」，呢句最打動小雨，只有仲有條命，就仲可以爆發。只要仲有一個人，就仲有一片宇宙。唔係傲慢，陳蕾知道我們有限，「沒鑽飾」也「沒遠征」，沒有純金精銀，也不能轟天動地。但，仰望遠空星星，細踏腳下清幽小徑，還可以吧。守護你能守護的人與事，孭起你自己的十架，不過分吧。

「有些傷口不結痂」，劇痛可能會減退，但血不會止。可是，流出的血可能滋潤別人的生命，就像耶穌的血，基督徒奉之曰聖餐，乜唔就係血淋淋的饅頭咩。

▍   緊密歌詞突破壓力

小雨睇到網上有人話，豹哥呢首歌好少重複歌詞，認同嘅，不過唔重複得嚟，緊密的歌詞，營造咗緊逼的氣氛，但又唔係咄咄逼人，反而似兩埲牆逼緊埋嚟要夾死你你要搏命跑逃生，呢種求生意志，呢個先正。

Bob Dylan〈暴雨將至〉呢點好似，同樣字字珠機，未及諗清一句講咩，就已經第二、第三句，表面聽落係水過鴨背，但loop多幾次呷真啲，就開始沉澱出一浸抗世智慧。

暴雨將至，每闕歌詞，歌手都問藍眼孩子一組問題：你身在何處，睇到啲咩，聽到啲咩。你遇見咩人，依家你又會做啲咩。

歌手自問自答，他處身迷霧森林，在彎曲公路上匍匐；他見到野狼圍住新生嬰孩，見到成千上萬的人舌頭被剪去；他聽到足以掩沒世界的浪聲，一人肚餓而眾人在笑；

他遇見一個男人被愛情所傷，另一個男人被仇恨刺透；他要走進黑森林的肚腹，走近飢餓而被遺忘的人群當中，站立在海面直至沉沒。

大堆意象，像鼓聲累積，漸漸由蚊螆般細，蘊釀成驚天之雷。

▍   孤獨的唱作先知

陳蕾攞完奬，話最開心係攞到「唱作人」銀奬，但就算攞唔到奬，都好滿意能成為自己喜歡的唱作人，自己作的歌，自己聽返仍然感動。

小雨諗起寺山修司《拋掉書本上街去》，提到「歌謠」。所謂歌謠，無論幾多人聽到，都係孤獨的歌，只能唱畀自己聽，唔能夠合唱。而聽人唱歌謠，唔會好似追星咁迷到無咗自己，反而對歌手萌生敬意，無論佢係獨立(indie)定係主流。

無獨有偶，〈暴雨將至〉的歌手，雖然向深愛的藍眼孩提問，但回答的總是自己。〈窮人的薔薇〉竭力向某個聽眾呼喊「用眼睛觀看吧」、「用耳朵聽一聽」，但難掩未受聆聽的痛。兩首歌同樣孤獨而高貴，相映成趣，可能也算是另類的合唱，或和應吧～