最近有同工喺基督教書展買咗本書，書名係《當教會遇上年青人》，呢本書係《Growing Young》嘅中文版，本書未睇完，但都有啲反思，當中講到傳承信仰，講到：「儘管許多人都說要『傳承信仰』或『把信仰傳給下一代』，信仰不是我們可以擁有或交給任何人的物件。信仰也不是某一代比任何一代『擁有』更多的商品。」（頁148）

有時我哋講教會要傳承，就係邀請新一輩嚟學我嗰套，希望將我嗰套能夠傳承畀下一代，出發點係好嘅，將美好嘅傳承讓新一代黎承接。不過，有時就會容易有一種，「舊有固有嗰套永遠是對的」嘅感覺。當然我唔係要反傳統，傳統有佢要持守嘅地方，有佢好嘅地方，係要持守的。

我意思係講高舉傳統，或者用「過去嘅做法」呢樣嘢凌駕於一切嘅時候，可能未必讓新一代食得落，或者去掉一成不變嘅想法，覺得「我們在這裡已經好好」嘅諗法，容許一啲新元素嘅改變，又讓新一代有空間發揮，可能先可以讓兩者有溝通嘅空間。

我哋成日覺得一代不如一代，又或者其實每一代都面對緊唔同嘅嘢，其實係無得比。上一代面對緊火熱打拼嘅年代，只要心口有個勇字，為主打拼就是好美好；呢一代面對嘅拉扯挑戰多咗，或者係唔同嘅方向去建構信仰。

每一代都有神要佢哋走嘅路，信仰也不是某一代比任何一代「擁有」更多的商品......可能我哋要學習嘅，係上一代和下一代都一同放低「代」呢個字，唔好讓「代」呢個字，成為同行一齊經歷嘅阻隔。

本書之後又講到：「如果我們決心陪伴年青人踏上建構信仰的旅程，或許我們可以把一群人一起建構信仰稱為建立教會（churching），即是整個群體一起跟隨耶穌，在日常生活的處境中發現信仰。」（頁149）教會傾向以「事工」為本，以達致有效率易管理嘅牧養，呢個都係重要嘅。不過我哋呢幾年成日都會聽唔同人講，事工好多時都演變成「做事嘅工作」，但卻有時遠離咗「做人嘅工作」。

事工的確會睇佢嘅成效，有冇短期嘅人數增長同埋效果，卻忽略咗人嘅生命成長從來唔喺我哋手中。同樣並不能只用效果去衡量，外在嘅doing並唔一定等於being嘅轉化，而being嘅轉化都係喺生命中唔同狀態嘅起起伏伏磨練番嚟，我哋只係需要同行陪伴。

咁我哋就發現，一齊建構信仰唔只係喺事工中，而更係喺日常生活中，即係星期六日以外嘅時間，所以比起喺教會入面，走進生活去一同擁抱生命中焦慮、掙扎、懷疑，一同尋找經歷，係churching好重要嘅一環。

就如本書呢個chapter最後嘅總結，我哋唔係只係教導年輕人相信甚麼，而是教導佢哋如何相信，並活出好消息。

（轉載自作者IG）