Bensoncf：面對異端，不問因由地防範抑或反省的對話？

近日教會最關注的熱話是南韓異端「新天地」大規模造訪教會同埋機構，邀請各教會出席1月14日下午在馬灣挪亞方舟的「全球華人教牧新年聯合特會」。我對新天地無乜太多研究，但呢件事令我諗起返以前接觸過嘅異端，同埋在牧會過程中所觀察到教會信徒面對異端的態度上，發現仲有啲嘢可以再進步下。

牧會生涯中，不時都會有信徒向自己查詢：「XXX係唔係異端？」多數我都會問返點解佢會有所懷疑，通常信徒都係無心機去研究。我發現信徒只係想知「XXX係唔係異端」，而唔係太想知「點解XXX係異端」或「XXX邊一部分出事構成咗佢係異端」。信徒只係想要簡單的「答案」：教牧話「係」就防備，教牧話「唔係」就信晒。其實咁樣，只係養緊一班完全唔思考嘅信徒。

我認為信徒唔應該唔用腦咁只係盲信教會權威，某某牧師話係異端就防範，某某神學院講就警惕，而是要肯去自己做下「功課」，落下苦功去研究，能夠答到自己點解XXX是或不是異端。當我們要斷定一個組織為「異端」時，我們有無經驗過一種「對話」過程呢？今次新天地教會的事，勾起返我以前接觸過異端異教的經驗：

▍ 與「耶和華見證人」在M記長達5小時的對話

耶和華見證人（Jehovah‘s Witnesses）經常用cold call不同的人去傳佢地嘅「福音」。以前我仲係大學year 1初信主一年幾，收到耶證個電話，果位女仔就同我引用「聖經」，我因為太得閒就同佢傾，傾傾下佢傾唔掂就搵另一個男人（應該是旁聽電話訓練中）同我傾，講到有關「三位一體」的神觀，電話傾咗兩粒鐘，我就膽生毛話：「不如出嚟再傾啦！」當時就約咗去太和M記坐低傾，我帶埋教會一位弟兄，同佢地一男一女喺M記一齊對話。

耶證經常引用的「聖經」，係佢地獨特的《新世界譯本》，我地就用《和合本》，佢地經常叫我地揭開某段聖經，由於我當時已經都幾熟聖經，我揭得快過佢地，佢地好驚訝，最後傾咗3小時，和平散去。因為呢次經歷，推動我去親自研究自己信緊嘅神點解係「三位一體」。後來也知道今日我地自認是純正的教會，耶證就視為「異端」，佢地內部原來有一本書叫做《推理》，專係訓練耶證點樣引聖經去辯駁基督徒。但呢個對話經驗令我更加堅固自己的信仰，亦唔只係教會權威話耶證「係」就係。

坦白講，除咗「耶和華見證人」我曾經有落力去研究甚至對話之外，有些公認的異端（例如摩門教、錫安教）我都未有親身去研究過，都只是「信」教會權威，但其實係唔應該嘅。我覺得未至於要下下親自「送羊入虎口」，但起碼態度唔係只是求個簡單答案，而唔趁機會好好反省自己信緊啲乜。

某些基督徒好興「宗教對話」，但好似唔多覺有人提出「異端對話」。其實當我地話人係異端，異端都話你係異端。跟隨耶穌的第一世紀信徒，在猶太人眼中都是一個「異端」。以前經常有句話：異端成功嘅原因，係因為教會的缺乏。即異端點解有market？因為純正教會有嘢做得唔夠。所以面對異端的出現，教會要避免不問因由咁去盲目「防範 」或「警惕」，更加需要是在信仰對話中持續作反省、檢討甚至悔改。