最近呢10年，教會終於都無可奈何吹起一股「接棒的風」。原本以為高層可以做到2049，直至70歲80歲都唔需要退落嚟，但係偏偏中層凋零，新人上場，就要迫返高層交棒。咁又係咪真係會交棒呢？

小弟經過呢幾年觀察，特別由疫情期間人心惶惶，到疫情後有心可以做山寨王，可謂見證一個時代嘅轉變。教會想推嘅嘢，喺呢幾年尤其熱切推動，咁接棒作為重中之重，當然係要快快進行，莫失良機！

講到咁樣，你以為真係有傳承？結果係高層做吓樣，請吓人，請無厘頭啲嘅，或者唔多想領導嘅，甚至乎話收咗信，不過唔啱。咁點算，傳道人才荒啦，世界末日啦！ 然後教會繼續一個傳道人做幾十萬樣嘢，阿高層又繼續話請唔到人，繼續捱騾仔！

話分兩頭，係唔係真係人才？又係唔係真係有人想傳承？先唔講人才荒，淨係講傳承呢個問題，都幾令人頭痛！咩叫傳承？對我哋嚟講係傳承個信仰，將教會一啲珍貴嘅傳統傳落去，相信呢個係大部份基督徒或者教會嘅共識。但當你面對堂會高層，或者你有認真見過下教會工作，你就會發現佢哋講嗰種傳承係將嗰個堂會文化傳落去。堂會文化就係嗰啲你唔准做乜，你要幾時做啲乜等等，例如喺好古早嘅時代，有華人教會係唔俾人睇戲，話基督徒係光明之子，不在黑暗裡走。甚至最近好出名嗰套電影《破．地獄》，都有傳道同工話係宗教問題，叫啲人唔好睇。睇定唔睇，就由每個人自己判斷。

如果啲傳統係冇乜聖經根據，只係一啲人嘅個人喜好，咁究竟我哋傳嚟做咩呢？面對呢啲問題，華人教會充份體現出嗰種家長思想嘅極致，只係希望你跟住上一代嘅意思，唔好問咁多。咁究竟我哋傳承咗啲乜嘢呢？結果，教會想交棒就係交呢種棒，嗰啲一心諗住傳承信仰嘅人，就企咗喺度。俾到盡佢可以入職，但後來發現嗰啲傳承係家長文化傳承，咁傳嚟做乜嘢？咁咪交交吓棒交到跌棒，跌咗嘢要迫接棒嗰個人執，執嚟執去執唔到，就叫佢執包袱走人。然後原本個高層就可以大大聲話：「我唔係唔想交棒，係真係交唔到！」甚至乎佢可以用一種英雄嘅形象再度降臨喺堂會，幾威威！

（原載於作者IG @pastor_meme_hk）