魏恆：眾人都在泥濘中掙扎前行

人去到極限狀態，個樣會變成點？筆者今年第一次玩毅行，就有「極限狀態」嘅初體驗，畢生難忘。即使條路行得幾熟，都總有不測之風雲、意外嘅傷勢，然後只能凝視焦燥不安嘅內心，負傷嘅肉身孭起努力唔崩潰嘅靈魂，見步行步前進。

▍    眾人步伐唔同，但方向一致

大隊在北潭涌起步，就有種久違嘅熟悉感。上次玩山賽，只係諗起Hunter獵人試驗嘅隧道跑，始終比賽成份較重。但毅行者係講意志同埋團隊精神，每隊步伐唔同，但目標難得一致。原來已經好耐冇試過，咁大班人一齊朝住同一個方向行。

上西灣山時，已經見識到條路有幾爛，對鞋沾上泥漿而變重，但適應咗個重量，又幾好玩，同附近嘅隊伍有共同嘅歷險，有種無言嘅共鳴。

真正考驗係入黑之後未上雞公山，就見大隊人塞在路上某山頭。「傳話落去，前面有人傷咗，全部人都行唔到。」第一下聽到，係燥底的，畢竟好想行完呢段泥路。但諗諗吓，如果要所有人停低，咁佢一定傷勢幾重。後嚟知道，佢爆咗頭出血，要救護抬落山。「後面唔好行喇，前面未郁到！」、「後面有救護，讓路！」呢啲說話，同樣已經好耐、好耐冇聽過。

通路之後，人群好快拉開距離，喺凌晨時份踏泥，份外疲倦。每步都踩唔實，不時跣腳、甚至仆親，嗰時當然只專注在腳下，但事後諗返，其實呢份孤獨感其實個個都明，個個都係咁捱。上到雞公山，回頭望轉頭，見到一行頭燈閃爍，就明白，眾人都在泥濘中掙扎前行。

▍    因傷拖慢隊友，但未被嫌棄

過咗一半，落到獅子亭，先發現自己受嘅傷有幾嚴重。汗蒸發成鹽粒，𠝹損了兩邊大脾。幸好，到畢架山救護站包紥後，不再痛，可是大脾唔痛，就到腳板的水泡痛。就算包紥好，仍然好慢。前一半我都係帶頭，後一半我卻拖慢隊友進度，最後要大家捱兩晚通頂，好有歉意。

更唔好意思嘅係，要一班唔算好熟嘅support teammates幫我孭袋，甚至做我支拐󠄆杖，當我喺尾段搖搖晃晃想恰著，佢地扶住我令我唔使跌。我一直習慣獨自行山，磨練勇氣同意志，但原來軟弱嘅時候，學識放心依靠別人，都係非常重要，因為唔知幾時，就到人地需要你嘅扶持。

唔識照顧自己、逞強、自虐，呢啲或者都適合形容我，甚至我喺路上都不時咁樣質問自己，我嚟毅行係咪只係為咗證明自己行到？為乜搞病、搞痛自己？未答到，但至少明白：修行呢家嘢，固然唔可以由別人替你做，但同樣唔能夠冇咗別人嘅參與同支持。

完咗毅行，其實好似仲有一半靈魂喺大帽山迷霧裡蕩失路，揾唔返自己、同伴、上帝⋯⋯或者潛藏我意識底下，就係呢片無明，而真正要行嘅路，而家先啱啱開始。