新筆由紀：梗係要全方位搞旺夜市啦！

近期社會上好多人高呼要搞返旺夜市，講到夜市就是經濟復甦的必殺技咁，而在眾多夜市呼聲之中，最勁爆的莫過於飲食界張宇人議員的爺孫深夜劈酒論 —— 張弟兄話，搞返旺個夜場，等啲人唔好咁早瞓，阿爺都可以半夜同阿孫落蘭桂坊劈酒。（註：根據《時代論壇》2004年10月22日報道，當年首次當選立法會議員的張宇人，宣誓就任時手按聖經，等於公開宣示自己的基督宗教信仰；中文《維基百科》也就把張宇人的宗教信仰標示為「基督教」。）張弟兄的說法，雖然令14億人頗為震驚，但的確是個可以令香港夜生活與夜經濟全面活化的妙計，箇中奧妙，不可不知。

▍同孫劈酒  帶旺深夜醫療經濟

你知我知，香港政府嚴格規定不可以賣酒給未滿18歲人士，落得老蘭飲酒，必定夠晒18歲，baby face啲都隨時畀人check ID。而在幾代香港人普遍遲結婚遲生育的文化之下，能夠有個夠秤去劈酒的孫女，應該點都有七、八十歲啦。鼓勵這個年紀的長者去劈酒（即是狂飲暴飲，不醉無歸，不是輕嚐淺嚼慢慢嗒），輕則危害健康，重則隨時搞出人命。

有人因此認為張議員噏得就噏，醫生多得佢唔少，世界肝臟權威盧寵茂局長真係多謝晒。但原來大家真係get唔到箇中奧妙：同個孫劈酒，除了帶旺酒吧夜市，也同時可以帶旺醫療夜市。老人家，飲大咗出事了，不太嚴重的，可以去附近夜間診所求診；較嚴重的，譬如被車撞、跌落海，或者心臟病突發，就當然帶旺醫院急症室夜班啦。醫院、診所、救護等等，整個醫療前線，深夜當班的人必然倍增，那不單令醫療業夜市興旺，也必然帶旺飲食業、外賣業、交通運輸業（尤其是的士和他們的死敵）的晚間生意。小學讀成語：一石二鳥，就是這樣囉！

▍力推守夜文化  建設全方位夜市

不過，不要以為張議員的貢獻僅止於此！那些出事的長者，總有一部份撒手塵寰。死亡人數增加，自然帶旺殯儀業。過去幾年大瘟疫，本來就死得人多；疫情退卻，不正常死亡自然大幅減少，殯葬經濟規模大有收縮的可能。但是，假如長者深夜劈酒的風氣搞得起，殯儀業必然重新興旺，分分鐘可以令香港變成國際殯儀中心。

而要令香港成為殯儀之都，就不得不大力推動沉寂多時的「守夜」文化，足以構成不可小覷的另類夜市。須知近年港人辦喪事，愈來愈慳水慳力，一來有人堅持要低調處理後事，只限家人參與，唔准他人插手；二來不少人傾向「一日搞掂」，即係安息禮拜或者破地獄同辭靈出殯、火化/安葬一條龍，全部安排在同一個上午或下午舉行，不設守夜；就算有所謂守夜，主人家往往八點幾就收拾走人，剩下先人孤零零一個瞓喺度，殯儀館亦關門大吉。但是從前不是這樣的。新筆由紀家門不幸死得人多，小時候親身經歷過，主家不到晚上11點過後都不會離開，12點前離開都算早走。聽長輩說，從前有些守夜人，會齊齊穿著孝服在靈堂上開幾枱麻雀打通宵。守夜喎，不是應該安靜的嗎？長輩說：佢地驚殯儀館太靜呀。哦，明晒。

講了那麼多守夜，其實我想說的是，守夜其實是一件很偉大的事，既是全情展現對逝者的終極敬意和不捨，也附帶著很多潛在的經濟價值 —— 多人守夜，成晚叫宵夜，刺激通宵外賣生意；守夜人在殯儀館打麻雀打機甚至唱K，推動深夜娛樂；而孝子賢孫之中總有積極備戰DSE的，不妨利用守夜時段補習。如此，又令各行各業生意大幅度擴展。能夠這樣深入地、毫無保留地、捐窿捐嚹地刺激夜生活，香港的夜市經濟騰飛，指日可待。

說到這裡，你怎能不佩服張宇人議員遠見超越常人？香港經濟能否翻身，可能就看此一役了。就算經濟復甦不似預期，至少有助紓緩人口老化、太多人苟延殘喘唔見佢死的難題。絕招！