YouTube頻道X辣有前成員自殺，引起各界關注，來龍去脈自己上網睇。呢件事令我諗起，我哋需要認真對待喺教會受傷呢個問題。

先戴返個頭盔，我哋都係罪人，教會係罪人嘅群體，互相傷害係會出現嘅。

入正題，喺教會受傷害會係一種咩形式？可以分為兩類：

一、欺凌。教會係一個講愛心嘅地方，你唔包容人就係你有問題，但往往我哋唔係包容，係縱容。欺凌就會係呢種縱容嘅氣氛底下不斷發生，教會一個二個當正自己係和平使者，然後對呢啲事好似睇唔到咁，最終被欺凌嘅人，就要離開呢個群體。

欺凌嘅種類有好多，但多數都係夾埋杯葛一個人，不論係積極杯葛，定係消極嘅不理會，都係會帶來傷害。

最多會發生嘅係「我都係同你玩吓！」呢類係中學先會發生嘅嘢，但喺教會成年人嘅群體，久唔久都會出現。

不論係傳道同工抑或弟兄姊妹，總係有欺凌佢哋嘅情況出現。簡單啲講，就係見佢好蝦，就蝦佢。（有補充嘅就喺留言補充，記住唔好出真身。）

二、過勞。呢個情況主要係出現喺大家一路做緊啲重重複複嘅嘢，而且係冇效果嘅。教會所有人進入一種冇事忙嘅狀態，但其實只係花咗啲時間喺嗰啲好無謂嘅嘢上面，包括開會、開會、同埋開會。聖經教導、主日學、崇拜講道，甚至關心弟兄姊妹，呢啲喺辦公時間內做唔到，你就要用私人時間去做，結果就係過勞。

受傷後出現嘅症狀：

一、瞓唔到覺。你會處於一種身心極疲累嘅狀態，但一到瞓覺嘅時候，個腦就好活躍。臨瞓前你會諗好多教會發生嘅嘢，有啲片段你揮之不去，例如你覺得嗰句說話可以講得好啲；呢啲都係受傷害嘅徵兆，少則令你難入睡，大則頻頻失眠。

二、對事情冇興趣，呢個同樣係抑鬱前嘅徵兆。你覺得咩都冇所謂，因為你好攰，冇體力、冇心機去做唔同嘅事情，最嚴重甚至屋企人喺你面前喊，你一啲感覺都冇。呢個情況係嚴重嘅，遇到一定要搵適當嘅輔導、精神科醫生尋求協助。

處理方法：

一、搵專業人士協助，包括頭先講嘅精神科醫生、輔導人士，甚至人生教練、教內前輩都可以，最緊要係你信得佢過，信唔過就搵啲可以信任嘅人先好開始傾，如果唔係就會變成二次傷害。

二、離開場景。可能係離職、離開呢間教會，或者係同教會申請停薪留職，都係一種離開場景嘅方法。咁樣可以即時停止傷害，先止血然後在尋求幫助。

最後補充一句：呢個page有好多同路人，大家都受過唔少氣，返教會慘過返工（又或者你係傳道人，返工返教會都好慘），有咩唔怕講（請保持身份隱藏），一定有出路！

（轉載自作者IG；標題為編者所擬）