琴日同一間教會進行最後一堂嘅社關訓練，同事帶弟兄姊妹落區探清潔工友，今次要大家唔拎任何物資落去，試下淨係同佢哋傾偈，睇下可唔可以識到工友。

咁樣做嘅原係過往大家參與過嘅探訪或關懷行動，大部份都係透過其他團體所安排，而每次都梗係要有啲野喺手攞落去派先至叫有安全感，要大家冇野喺手，又要自己去搵街坊、去探，目的就係要大家以第一身去感受自己主動去接觸街坊嘅過程，以第一身服侍者角色去做社關，咁樣大家先至會明白人哋去落區開荒、做社關，係一件點樣嘅艱辛事，點樣去珍惜同街坊建立嘅關係，去除所有被安排嘅被動感同距離感，仲有探訪過程中種種嘅儀式感。

▍　祈禱求上帝為清潔挪開街上便便？

過程中有參與者聽到工友向佢反映，成日都有狗主冇清理狗便便，搞到成街都係，而最後執手尾嘅就係班工友。而事實上狗主係有責任去清理自己狗隻喺街上面嘅大小異便。工友叫教友幫佢哋發聲，反映畀政府部門知，等佢哋改善下。

返到嚟大家分享經歷嘅時候，我哋就嘗試問返大家：「你而家聽到工友希望你哋做啲野，你哋會點回應？」起初大家都無所適從，但慢慢透過不停反問同諗方法，先至發現大家其實都感受到工友嘅需要，亦有嗰份激動想回應、為佢哋主持公道，但呢份激動卻只能夠停留喺腦海中，未能夠付諸行動為工友發聲。

唔通我哋見到工友咁嘅情況，我哋淨係識：「咁我哋會幫你祈禱，求上帝挪開啲便便？」我咁樣講你都笑啦！大家傾傾下覺得其實唔係喎！係可以做啲野嘅，可以透過反映有關部門又好，透過社交平台分享俾人知又好，又或再認真啲喺條街做便便調查又得姐，唔會話冇野好做喎！

▍　要人悔改、伸張公義非二元　均呈現福音

事實證明好似有位教友所分享，其實只要為呢班人呢件事仔細諗多啲，掌握多啲處境嘅資訊，冇話冇野做唔到嘅！大家都必須承認教會做社關係有佢哋嘅agenda，係有佢哋神學觀裡面其中一種對福音嘅詮釋，而唔係完整嘅呈現。公義嘅伸張係呈現緊福音，要人悔改得救亦係呈現緊福音，冇必要厚此薄彼，二元對立。只係過往教會嘅牧養系統裡面，從來冇教過我哋點樣去回應社會裡面發生嘅唔公義同壓迫。

當我哋披戴著教會傳統與文化嘅意識形態落區服侍基層，滿口屬靈語言去祝福別人、去宣講福音嘅同時，又會唔會有另一種可能係？我哋可以手中緊緊地抓住教會過往意識形態嘅同時，另一手係學習脫離教會意識形態嘅睇見？去掉所有嘅規範、手法、方式同儀式感，坦蕩蕩咁進入呢個我哋所謂嘅「俗世」，睇見赤裸嘅貧窮、壓迫同唔公義？拉近同社區唔同持分者嘅距離感，嚟一個超越信仰、階級同意識形態嘅對話？

（文章轉載自作者FB；分題為編者所擬）