CHY：悼見證我成長嘅老狗Golddie
黎到加拿大就快一個月，大致上也settle了。早前收到家人的消息，家中的老狗Golddie，喺我離開香港兩星期後安祥地離世。
Golddie喺2007年夏天出世，一出世就離開咗媽咪，被發現嘅時候已經喺垃圾站，之後就執咗佢返黎，黎到我屋企。
Golddie黎到果陣輩份最細，又無其他狗咁醒目，無咩地位。所以佢都從來唔會同其他狗爭食物，亦唔會爭寵，一直都最唔起眼。
▍ 因為Golddie，我祈左人生第一個禱
後來因為各樣原因，屋企人送走晒啲狗。有好一段時間無見Golddie，之後屋企人再接返佢，佢已經唔認得我。
遇到咁嘅情況我都反應唔切，不過亦因為Golddie，當時我發出人生第一個禱告，內容大概係希望上帝保守佢，最終比佢搵到個好屋企。我會記掛住依個家人之類。果陣我返咗幾次教會，仲未信耶穌。但祈完Golddie又真係有認得我，我覺得好神奇，最後帶咗Golddie返屋企，並將依件事記在心上。
我好少同人分享自己因為依個情節而信耶穌，因為自己講出黎都覺得有啲牽強、有啲膠。後來教會辦佈道會，被邀請決志，我無猶豫太多就舉手。當時隔離果個喊到聲嘶力竭，但其實我當時無咩感動，亦都抱怨過自己決志果陣唔夠轟轟烈烈。不過後尾發覺，當時單純覺得上帝好真實，所以信左，其實都唔錯。
▍ 溫柔的默默陪伴
直到上年九月，Golddie身體差左好多，視覺同聽覺都退化，行路開始吃力，胃口差左。由果時開始，我大概都知佢就快唔得。上兩星期經醫生評估，Golddie身體太虛弱，所以最後喺屋企，由家人陪同下安樂死。
Golddie由初中一直陪伴住我，見證我幾個不同時期、幾個重要嘅改變。當然，其實佢係唔會認知同理解到我個人改變左啲咩，所謂嘅見證，不過係態度始終如一，每日重複同一項動作，同一種生活作息；返到屋企會撲向你，瞓覺會瞓喺牀邊。依種最簡單嘅陪伴，超越語言，你會知道就算唔出聲，佢都會行到你身邊。
默默嘅陪伴，溫柔又強大。希望佢去到天家開開心心，自由自在地生活。
【悼見證我成長嘅老狗Golddie】
文：CHY
